2000 ମସିହାର ଗଣନା ଆଧାରରେ ପ୍ରସ୍ତୁତ 2013-2014 ଆର୍ଥିକ ବର୍ଷର ଜିଲ୍ଲା ବାର୍ଷିକ ଯୋଜନା ଅନୁସାରେ ଜିଲ୍ଲାର 47.2 ପ୍ରତିଶତ ପରିବାର ଦାରିଦ୍ର୍ୟ ସୀମାରେଖା ତଳେ ରହୁଥିବାରୁ ଏହା ଓଡିଶାର ଅନ୍ୟତମ ପଛୁଆ ଜିଲ୍ଲା ଭାବେ ପରିଗଣିତ ହୋଇଛି । ଜିଲ୍ଲାର ଅର୍ଥନୀତି କହିଲେ ସାଧାରଣତଃ କୃଷି ଭିତ୍ତିକ ଅର୍ଥନୀତିକୁ ହିଁ ବୁଝାଇଥାଏ ଏବଂ କୃଷି, ଉଦ୍ୟାନ କୃଷି, ଗୃହପାଳିତ ପ୍ରାଣୀ ପାଳନ, ଜଙ୍ଗଲଜାତ ଦ୍ରବ୍ୟର ବିକ୍ରୟ ଓ ପର୍ଯ୍ୟଟନ ଆଦି ଅର୍ଥନୀତିର ମୁଖ୍ୟ ଆଧାର ଅଟେ । ଜିଲ୍ଲାର ଜନ ସାନ୍ଧ୍ରତା ସର୍ବନିମ୍ନ ଏବଂ ଏହା ଏକ ଜନଜାତି ବହୁଳ ଜିଲ୍ଲା ଅଟେ । ଜିଲ୍ଲାରେ ଉତ୍ପାଦିତ ଅଦା ଓ ହଳଦୀ ପାଇଁ ଭାରତରେ ଏହାର ସ୍ଵତନ୍ତ୍ର ପରିଚୟ ରହିଛି । ରାଜ୍ୟର ଅର୍ଥନୀତିକୁ ସୁଦୃଢ କରିବାରେ ଜିଲ୍ଲାର ସିଲେଇଯୁକ୍ତ ଶାଳପତ୍ର ଖଲି ଓ ଦନା ଏକ ପ୍ରମୁଖ ଭୂମିକା ଗ୍ରହଣ କରିଛି ।
2004-2005 ଆର୍ଥିକ ବର୍ଷରେ ଓଡିଶାର ବ୍ୟକ୍ତି ପିଛା ସମସ୍ତ ଘରୋଇ ଉତ୍ପାଦର ଆକଳନ ମୂଲ୍ୟ 23,968 ଟଙ୍କା ଥିବା ବେଳେ କନ୍ଧମାଳ ଜିଲ୍ଲାରେ ଏହା 40,729 ଟଙ୍କା ଥିଲା । 2004-2005 ବର୍ଷର ସମସ୍ତ ଘରୋଇ ଉତ୍ପାଦକୁ ଦୃଷ୍ଟିରେ ରଖି 2010-2011 ବର୍ଷ ପାଇଁ କରାଯାଇଥିବା ଗଣନା ଅନୁସାରେ ଘରୋଇ ଉତ୍ପାଦନ କ୍ଷେତ୍ରରେ କନ୍ଧମାଳ ଜିଲ୍ଲା 2.56 ପ୍ରତିଶତ ଅଂଶଦାନ କରି 13 ତମ ସ୍ଥାନରେ ରହିଥିଲା । ଜିଲ୍ଲାର ମୂଳ ଓ ପ୍ରକୃତ ଘରୋଇ ଉତ୍ପାଦ କ୍ଷେତ୍ରରେ କୃଷି ଓ ଆନୁଷଙ୍ଗିକ କ୍ଷେତ୍ରରୁ ହେଉଥିବା ଆୟ ସର୍ବାଧିକ ଥିବାବେଳେ ଏହା ପଛକୁ ସେବା କ୍ଷେତ୍ର, ବ୍ୟାଙ୍କ ବ୍ୟବସାୟ, ସ୍ଥାବର ସମ୍ପତ୍ତି କ୍ରୟବିକ୍ରୟ ଓ ନିର୍ମାଣ ରହିଛି । ଶିଳ୍ପ ଜନିତ ଆୟ କ୍ଷେତ୍ରରେ ଜିଲ୍ଲାର ମୂଳ ଓ ପ୍ରକୃତ ଘରୋଇ ଉତ୍ପାଦ ମୂଲ୍ୟ ସର୍ବନିମ୍ନ ଅଟେ । କୃଷି ଓ ଆନୁଷଙ୍ଗିକ କ୍ଷେତ୍ର ସହିତ ଉଦ୍ୟାନ କୃଷି, ଗୃହପାଳିତ ପ୍ରାଣୀ ପାଳନ, ମତ୍ସ୍ୟ ଚାଷ, ଜଙ୍ଗଲଜାତ ଦ୍ରବ୍ୟ ଉପରେ ଜିଲ୍ଲାର ଅର୍ଥନୀତି ନିର୍ଭର କରେ । ଜମି ଏହି ଜିଲ୍ଲାର ଏକ ମୁଖ୍ୟ ସମ୍ପତ୍ତି ହୋଇଥିବାରୁ ଜମି ଆଧାରିତ କାର୍ଯ୍ୟକଳାପ ମୁଖ୍ୟ ଜୀବନଜୀବିକା କାର୍ଯ୍ୟ ଅଟେ । ଭାରତ ବଣ୍ୟ ସର୍ବେକ୍ଷଣ ବିବରଣୀ 2011 ଅନୁସାରେ ଜିଲ୍ଲାର 68.18 ପ୍ରତିଶତ ଅଞ୍ଚଳ ଜଙ୍ଗଲ ପରିବେଷ୍ଟିତ ଅଟେ । ଘଞ୍ଚ ଜଙ୍ଗଲ ପରିବେଷ୍ଟିତ ହୋଇଥିବାରୁ ଏଠାରେ ହଳଦୀ, ଝାଡୁ, ତୈଳବୀଜ, କେନ୍ଦୁପତ୍ର, ଔଷଧୀୟ ବୃକ୍ଷ, ଝୁଣା, ଆଦି ଲଘୁ ବନଜାତ ଦ୍ରବ୍ୟ ବହୁଳ ପରିମାଣରେ ମିଳିଥାଏ । ଭୌଗଳିକ ଆକୃତିରେ ଭିନ୍ନତା ଯୋଗୁଁ ଜିଲ୍ଲାର 70 ପ୍ରତିଶତ ଅଞ୍ଚଳ କୃଷି କାର୍ଯ୍ୟ ପାଇଁ ଅନୁପଯୁକ୍ତ ଅଟେ । ଉଦ୍ୟାନ କୃଷି ପାଇଁ ଜିଲ୍ଲାର ଜଳବାୟୁ ଅନୁକୂଳ ହୋଇଥିବାରୁ ହଳଦୀ, ଅଦା ଓ ମହୁ ପାଇଁ ଜିଲ୍ଲାର ସୁନାମ ରହିଛି । 2011-2012 ଆର୍ଥିକ ବର୍ଷ ସୁଦ୍ଧା 2.88 କୋଟି ଟଙ୍କା ବିନିଯୋଗରେ ଜିଲ୍ଲାରେ 116 ଟି ଅଣୁ-କ୍ଷୁଦ୍ର-ମଧ୍ୟମ ଉଦ୍ୟୋଗ ଥିଲା । ଜିଲ୍ଲାକୁ ଅର୍ଥନୈତିକ ବିକାଶ ପଥରେ ନେବା ଦିଗରେ କୃଷି, ଉଦ୍ୟାନ କୃଷି, ପର୍ଯ୍ୟଟନ, ଜଙ୍ଗଲ ସମ୍ପଦ ଏବଂ ଅଣୁ ଉଦ୍ୟୋଗ ଗୁଡିକ ପ୍ରମୁଖ ଭୂମିକା ନିର୍ବାହ କରୁଛି ।
